Utanforskapet er stort, samtidig som mange norske kommunar må fram med sparekniven. Finst det likevel moglegheiter for arbeidsretta rehabilitering i kommunal regi? Sjå opptak frå Arendalsuka, der to kommunar delte sine erfaringar og perspektiv knytt til nettopp denne problemstillinga.
Av Guro Lien
Nasjonalt kompetansesenter for arbeidsrettet rehabilitering
Regjeringa ynskjer ei helse- og omsorgsteneste som fremjer førebygging og meistring. Det skal vere enklare å meistre livet med sjukdom eller nedsett funksjon, og alle som kan og vil jobbe skal få moglegheit til det.
I Nasjonal helse- og samhandlingsplan står det at kommunal arbeidsretta rehabilitering skal styrkast, men mange kommunar står dårleg rusta og kjenner seg usikre på ei slik oppgåve. Samstundes står kvar femte person i arbeidsfør alder utanfor arbeid og utdanning – mange på grunn av helseutfordringar.
Kva i all verda skal kommunane gjera no, når meir og meir ansvar fell på dei?
Møt ein kommune i villreie, og ein kommune som har løyst floka på eige initiativ: Kva kan dei lære av kvarandre, og kva kan me lære av dei?